【K1面試懶人包】名校幼稚園面試100問大公開！ 一文看清衣著/調整生理時鐘/文件準備清單
來年升讀幼稚園K1的面試展開，新手爸媽即使準備充足，都會感到焦慮緊張 ，甚至比小朋友更加不知所措！要成功考入心儀幼稚園，除了小朋友臨場表現，家長的事前準備同樣是致勝關鍵。
小編為大家整理了「幼稚園面試前必看的5大注意事項」，及綜合名幼面試「過來人」家長提供的「K1面試100條必問實用題庫」，讓各位爸爸媽媽參考，提早為孩子做好心理與實戰準備！
幼稚園面試前5大準備
很多家長只專注於訓練小朋友答問題，卻忽略了面試當日的細節。以下 5 件事絕對能影響校方對家庭的第一印象：
1. 面試衣著打扮：切忌浮誇主打「Smart Casual」
- 小朋友衣著： 以整潔、舒適、方便活動為主。男孩子可穿企領Polo衫配及膝褲；女孩子可穿連身裙配搭小外套。切忌穿著過於繁複的公主裙、全套西裝打領呔，或穿著不習慣的新鞋，以免小朋友感到拘謹不適而扭計。
- 家長衣著： 以斯文大方的 Smart Casual 為佳。男士可穿恤衫配西褲；女士可穿及膝裙或斯文套裝。避免穿著牛仔褲、短褲、拖鞋或過分暴露的衣物，亦不建議全身名牌，給人離地的感覺。
2. 調整小朋友「生理時鐘」
這是最常被忽略卻最致命的一點！如果面試時間剛好撞正小朋友平日的「午睡時間」或「吃奶時間」，小朋友極容易扭計、大喊或發呆。建議在面試前一至兩星期，逐步調整孩子的作息時間，讓他們在面試該時段保持最精神、最活躍的狀態。
3. 文件及物資準備清單
出門前務必檢查面試袋，避免臨急抱佛腳影響心情。必備物品包括：
- 面試通知書 / 報名表副本
- 小朋友出生證明文件（正本及副本）
- 父母身份證（正本及副本）
- 小朋友證件相片（多備幾張）
- 回郵信封（貼好足夠郵票）
- 小朋友的個人檔案（如學校容許提交）
- 安撫物資：少量乾糧、水樽、後備衣物、紙巾及濕紙巾
4. 心理建設：當作「去新地方玩」
千萬不要對小朋友說「今日去面試，你要乖啲、要答啱問題」，這會無形中增加他們的壓力。建議說：「今日帶你去一間好靚嘅學校，同老師、新朋友一齊玩玩具」，讓孩子在輕鬆愉快的心情下展現真性情。
5. 日常生活融入禮貌與規矩
面試其實從「踏入校門」那一刻已經開始。平時在生活中要教導小朋友基本禮貌，例如：敲門才進入、見到老師主動講「早晨」、接過玩具要講「多謝」、離開時講「拜拜」、玩完玩具懂得自己收拾、將椅子推好等。這些細節往往是老師評分的重點。
幼稚園 K1 面試 100 問
小編將過名校幼稚園面試中最常出現的問題，歸納為 100 條最實用題庫，分為小朋友及家長篇，建議家長與小朋友以遊戲方式練習。
第一部分：個人資料及家庭生活
- 你叫咩名？
- 你今年幾多歲？
- 你係男仔定女仔？
- 今日邊個帶你嚟學校？
- 你爸爸/媽媽叫咩名？
- 你屋企有幾多人？
- 你有冇兄弟姊妹？佢哋叫咩名？
- 你住喺邊度？（答地區即可，如：沙田）
- 你平時鍾意人哋點樣叫你？
- 你幾時生日？
- 平時喺屋企邊個照顧你最多？
- 邊個會陪你食飯同瞓覺？
- 你最鍾意屋企邊個地方？
- 你屋企有冇養小動物？叫咩名？
- 爸爸媽媽放假通常帶你去邊度玩？
第二部分：日常生活與自理能力
- 你朝早幾點起身？夜晚幾點瞓覺？
- 你平時搭咩交通工具返學/出街？
- 你識唔識自己著鞋同除鞋？
- 你識唔識自己著衫同除衫？
- 你識唔識自己去洗手間？
- 你識唔識自己洗手同抹手？
- 食飯之前要做啲咩？（答：洗手）
- 你識唔識自己用匙羹食飯？
- 你最鍾意食咩？有咩唔鍾意食？
- 玩完玩具之後你要點做？（答：自己收拾好）
- 你識唔識自己打開水樽飲水？
- 你喺屋企會唔會幫手做家務？
- 瞓覺之前你會做啲咩？（答：刷牙/聽故事）
- 你放學返到屋企會做咩？
- 如果你要去廁所/尿尿，你會點同大人講？
第三部分：喜好、認知與常識
- 你最鍾意玩咩玩具？
- 你最鍾意睇咩卡通片/圖書？
- 你最鍾意咩顏色？點解？
- 你最鍾意咩動物？小狗/小貓會點樣叫？
- （出示生果）蘋果係咩顏色同形狀？
- 今日天氣係點呀？（答：晴天/陰天/落雨）
- 落雨嘅時候要帶啲咩出街？
- 過馬路要睇咩燈？（答：紅綠燈）
- 聖誕節 / 中秋節會做啲咩或者食啲咩？
- 巴士同飛機，邊個喺天上飛？
- 醫生同老師，邊個會幫人睇病？
- （出示圖卡）呢張圖卡入面係咩動物？
- （出示兩件物件）邊個大啲？邊個細啲？
- （出示兩條線）邊條線長啲？邊條短啲？
- 試下數下枱面有幾多粒糖？（1-10以內）
第四部分：聽從指令與小手肌操作
- 麻煩你將紅色積木放落藍色箱度。
- 拎兩粒糖畀老師吖。
- 請你坐喺張黃色凳度。
- 請你跟住老師拍三下手。
- 試下將呢啲積木按大細排好。
- 試下將呢條繩穿過呢粒珠仔個窿度。
- 幫老師攞張紙巾吖，唔該。
- 將本書放喺枱面。
- 試下跟住老師做呢個動作。（如摸頭、舉手）
- 請你將圖畫紙傳畀隔離個小朋友。
- （物件分類）請你將車仔同積木分開擺。
- 將呢個圓形拼圖放落啱嘅窿度。
- 起身轉個圈，然後跳兩下。
- 畫一條直線或者一個圓形畀老師睇。
- 畫完畫，請將顏色筆放返入筆筒入面。
第五部分：社交、禮貌與情境應對
- 入到課室見到老師要講咩？（答：早晨）
- 老師畀貼紙/禮物你，你要講咩？（答：多謝）
- 唔小心撞親人，要講咩？（答：對唔住）
- 走嗰陣時要同老師講咩？（答：拜拜 / 再見）
- 想玩其他小朋友嘅玩具，你會點樣問？
- 人哋問你借玩具，你會唔會借畀佢？
- 如果有小朋友跌親或者喊，你會點做？
- 如果你自己跌親或者唔舒服，你會點算？
- 如果你唔見咗件玩具 / 唔見咗媽媽，你會點做？
- 老師講緊故事嘅時候，你應該點樣？（答：靜靜地聽）
- 排隊玩滑梯嗰陣，可唔可以推人？
- 你想要嘅嘢人哋玩緊，你會點做？（答：排隊 / 輪流玩）
- 唔小心打翻咗杯水，你會點處理？
- 如果好想搵媽咪，你會點同老師講？
- 做錯事嗰陣你會點做？
- 有人主動同你打招呼，你會點樣回應？
- 喺小組入面，你鍾意自己玩定係同大家一齊玩？
- （看圖說話）圖片入面嘅小朋友做緊咩？
- （看圖說話）你覺得圖入面邊個最開心？
- 遇到唔識答嘅問題，你會點做？
第六部分：家長面試必問
學校不但看重小朋友，亦非常看重家長的教育理念是否與校方一致。家長請準備好以下 20 條常見問題：
- 點解會選擇報讀我哋呢間幼稚園？
- 你對我哋學校嘅教學理念有咩理解？
- 除了我哋學校，你仲有報考其他幼稚園嗎？
- 如果小朋友唔獲取錄，你會有咩後備方案？
- 你認為幼兒教育最重要嘅係咩？
- 你希望小朋友喺幼稚園三年學到啲咩？
- 平時主要由邊個照顧小朋友？（嫲嫲/婆婆/工人姐姐？）
- 父母雙方平時點樣分配陪伴小朋友嘅時間？
- 假日通常會帶小朋友進行咩親子活動？
- 小朋友平時有冇上開 Playgroup 或幼兒中心？
- 小朋友遇到挫折或喺街上發脾氣大喊時，你會點處理？
- 你點樣看待幼稚園嘅功課量？（喜歡Happy School還是學術型？）
- 如果小朋友喺學校同其他同學發生衝突，你會點處理？
- 小朋友適應新環境通常需要幾耐時間？
- 你會點樣配合學校嘅教學方針及活動？
- 喺屋企通常邊個負責同小朋友進行親子共讀？
- 你覺得小朋友性格上有咩優點同缺點？
- 請問小朋友有冇食物敏感或其他特別需要注意嘅地方？
- 你對「家校合作」有咩期望？
- 你對小朋友將來嘅升學或發展有咩期望？
面試只是孩子成長路上的一個小體驗，家長切忌因為過度操練而破壞了親子關係。保持平常心，讓孩子展現最純真、自然的一面，往往就是贏得老師歡心的最大必殺技！
